Нарындагы экологиялык билим берүү иш-чараларына 800дөн ашык адам катышты

✅15-апрелден 18-апрелге чейин NABU Кыргызстан уюмунун «Экологиялык билим берүү жана коомчулук менен байланыш» бөлүмүнүн кызматкерлери «Өз жериңдин табиятын коргоодо сенин салымың» аттуу темада Нарын облусуна караштуу Жумгал районунда экологиялык билим берүү иш-чараларын өткөрүштү.

✅Ага райондун Кызарт, Куйручук, Түгөл-Сай, Баш-Кууганды, Байзак, Чаек, Кызыл-Жылдыз жана Көк-Ой айылдарындагы жалпы орто билим берүү мектептеринин 7-8-9-10-класстарынын окуучулары катышты. Экологиялык билим берген иш-чарада аларга Нарын облусунун өзгөчө корголуучу жаратылыш аймактары жана биологиялык ар түрдүүлүгү жөнүндө маалымат берилип, өз жеринин табиятын сактоодо экологиялык жөндөмдөрдү (полиэтилен баштык ордуна шопер, шейкер, термочөйчөктөрдү көтөрүү, энергияны сарамжалдуу колдонуу ж.б.у.с.) адат катары күнүмдүк турмушка колдонууга түшүндүрмө берилди.

✅Аны менен бирге комуз коштоосу менен улуттук салттуу билимдин негизинде дубандын жаратылыш байлыгын, кооздугун экологиялык көйгөйлөрдү чагылдырып тарыхый чыгармачыл инсандарды камтып, “Теңир тоо” термеси аткарылды.

✅Иш-чарада өзгөчөлөнгөн окуучулар белектер менен сыйланды.

✅Ал эми мектепке чейинки даярдоо балдар бакчаларында «Жаратылышта жаңы дос» аттуу куурчак оюуну тартууланып, “Тазалыкты сактайлы” аталышында презентация жасалып, экологиялык оюндар ойнотулду.

✅Мектептер жана бала бакчалардан сырткары, ар бир айылдык китепканаларына экологиялык китептер китепканалык фондко берилип, кошумча белектер дагы тапшырылды.

✅«Кызарт-Күйручук» айыл өкмөтүнүн башчысы Жанайым Данияр кызы, Байзак айыл өкмөтүнүн башчысы Д.Бегалиев жана райондук билим берүү бөлүмүнүн башчысы Руслан Садыр уулу, Жумгал райондук мамлекеттик  аппарат жетекчиси М.Ж.Тентиев менен жолугушуу өтүп, иш-чаранын жүрүшү туурасында маалымат берилди. Ошондой эле аларга NABU Кыргызстандын атайын белектери тапшырылды.

✅Бул иш-чараларга жалпысынан 800дөн ашуун окуучу жана жеткинчек балдар менен 20дан ашуун айыл тургундары жана айыл өкмөт өкүлдөрү катышты.