Бүткүл дүйнөлүк Жер күнү Ысык-Көлдүн эң алыскы айылында да белгиленди

✅Бүгүн, 22-апрель – бүткүл дүйнөлүк жер күнүнө карата, NABU Кыргызстан уюмунун “Мониторинг” бөлүмүнүн кызматкерлери Ысык-Көл биосфералык аймагынын дирекциясынын кызматкерлери менен биргеликте Ысык-Көл облусунун Түп районундагы Сан-Таш айылынын “Каркыра” мектебиндеги окуучуларга экологиялык атайын иш-чара өткөрүштү.

✅Анын алкагында окуучуларга жердин маанилүүлүгү, жаратылышты сактоонун өзгөчөлүктөрү сыяктуу экологиялык маалыматтар берилди. Окуучулар менен суроо-жооп иретинде өткөрүлгөн иш-чарада NABU Кыргызстан уюмунун ишмердүүлүгү тууралуу маалыматтар берилип, атайын даярдалган белектер да тапшырылды.

✅ “Каркыра” мектеби 1-класстан 9-класска чейин гана окушат. Окуучулар 10-11-классты башка жактан окушат. Мектепте жалпысынан 60тын тегерегинде гана окуучусу билим алышат.

✅Аталган айыл алыскы тоо койнунда жайгашкандыктан, окуучулар биздин өкүлдөрдү кубануу менен тосуп алышты жана алар берген экологиялык маалыматтарды терең кызыгуу менен кабыл алышты.

✅Эске салсак, 22-апрель – Жер күнү (Earth Day), глобалдык деңгээлде белгиленүүчү маанилүү күндөрдүн бири. Бул күн адамдарды жаратылышты коргоого үндөп, экологиялык маселелерге көңүл бурууну максат кылат.

✅Жер күнүн белгилөө 1970-жылы АКШда башталып, 1990-жылдан тарта дүйнөлүк деңгээлде майрамдала баштаган. Азыр 190дан ашык өлкөдө 1 миллиардга чукул адам ар кандай иш-чараларга катышат.

✅Бул күнү көпчүлүк жерде дарак отургузуу, таштанды тазалоо, экологиялык лекциялар, көргөзмөлөр жана жаратылышты аярлоого чакырган акциялар өтөт жана балдар үчүн тематикалык сабактар өткөрүлөт.

✅Жер күнү – табиятка болгон жоопкерчиликти эске салып, жашыл келечекке салым кошууга чакырган маанилүү дата.